चिरनेर परिसरातील घटनेतील गुन्हा १८ तासात उघड... पतीच्या प्रेयसीच्या हत्येप्रकरणी दोन महिलांना शहाबाजमधून अटक

उरण (प्रतिनिधी) - पतीचे दुसऱ्या महिले बरोबर असलेल्या अनैतिक संबंधातून पत्नी व मुलीने मित्राच्या संगनमताने पतीच्या प्रेयसीचा खून करून तो चिरनेर परिसरात टाकून दिला होता. उरण पोलिसांनी शिताफीने तपास करीत १८ तासांच्या आत खुनाचा उलगडा करीत दोन आरोपींना अटक करण्यात यश मिळविले आहे. पुढील तपास सुरू आहे. उरण तालुक्यातील चिरनेर येथील बापूजीदेव परिसरात २५ ते ३० निघृणपणे वार केलेल्या एका महिलेचा मृतदेह सोमवार दि. २४ फेब्रुवारी रोजी दुपारी ३ वाजता सापडला होता. आरोपींनी कोणतेही धागेदोरे सोडले नसल्याने पोलिसांना आव्हान होते. याबाबत उरण पोलीस ठाण्यात अज्ञात इसमा विरोधात गुन्हा दाखल करण्यात आला होता. सदर गुन्ह्यातील महिला आरोपी तबसुम मुक्तार अली संग्राम (४५), रुसार मुक्तार अली संग्राम(२१) हिचा पती यांनी मयत महिला कल्पना उर्फ जया तुकाराम घाणेकर(३४) हिच्याबरोबर प्रेमसंबंधातून विवाह केला होता. यामुळे कल्पना हिचा प्रियकर व त्याची पहिली पत्नी यांच्यात अनेकवेळा वादावाद झाले होते. एसीपी विठ्ठल दामगुडे, वपोनि जगदीश कुलकर्णी, गुन्हे पोनि अतुल आहेर, गुन्हे प्रकटीकरण पथकातील सपोनि काठे, सपोनि अटक कावळे, सपोनि वृषाली पवार, पोनि चव्हाण या पथकाने गुप्त माहितीच्या आधारे मयत महिला कल्पना उर्फ जया घाणेकर हिची ओळख पटवून शहाबाजगाव बेलापूर परिसरात राहणारी आई व मुलगी यांना ताब्यात घेऊन पोलीस खाक्या दाखविल्यानंतर त्या दोघींनी एका इसमाच्या साथीने गुन्हा केला असल्याची कबुली दिलीत्यानंतर या गुन्ह्याप्रकरणी त्यांना मंगळवारी (दि.२५) अटक केली. त्यांना न्यायालयात उभे केले असता ७ दिवसाची पोलीस कोठडी दिली असून फरार आरोपीचा तपास सुरू असल्याची माहिती पोलीस सूत्रांनी दिली.