पनवेल (प्रतिनिधी) - रायगडचे जिल्हाधिकारी डॉ. महेंद्र कल्याणकर यांच्या निर्धारातून अदिवासी बांधवांच्या सर्वांगीण विकासाच्या दृष्टीकोनातून केलेल्या सप्तसुत्री कार्यक्रमाची प्रभावी अंमलबजावणीचा भाग म्हणून कातकरी उत्थान अभियानातंर्गत पनवेल तहसील कार्यालयामार्फत कुपोषित व कमी वजनाची 47 बालकांना अन्नदा या स्वयंसेवी संस्थेच्या माध्यमातून पोषण पोटलीचे वाटप तहसिलदार विजय तळेकर यांच्याहस्ते ग्रामपंचायत सुकापूर याठिकाणी करण्यात आले.
या पोषण पोटलीमध्ये सुष्म मिश्रीत मकई, सोया, व गहू यांचे लाडू, डाळ, सोया व मल्टिग्रेन खिचडी व चिवडा चिक्की, भाजलेले चणे, राजगिरा, खजूर रोल, चित्रकला पुस्तके, कलर फेस मास्क या सर्व वस्तूचा सामावेश करण्यात आला आहे. पनवेल तालूक्यातील उर्वरीत सर्व कमी वजनाच्या लाभार्थ्यांना टण्याटप्याने पोषण पोटलीचे वाटप करण्यात येणार असल्याचे यावेळी सांगण्यात आले. तसेच बेटी बचाव व बेटी पढाव अभियानातंर्गत मुलींना सुखरूप जन्म दिलेल्या पालकांचे अभिनंदन प्रातिनिधीक स्वरूपात प्रशस्तीपत्रक देवून तहसीलदारांच्याहस्ते करण्यात आले. चेतन गायकवाड, बाल विकास प्रकल्प अधिकारी यांनी उपस्थितांना आहार, आरोग्य व स्वच्छता या विषयाबाबत मार्गदर्शन केले. तसेच बेटी बचाव बेटी पढाव शपथ घेवून कार्यक्रमाची सांगता करण्यात आली. यावेळी अन्नदा संस्थेचे संजय मिश्रा, महिला विकास संस्थेकडून म्हात्रे, पंचायत समितीचे विस्तार अधिकारी घरत, तलाठी जोशी, ग्रामविकास अधिकारी सुदिन पाटील, पर्यवेक्षिका तांडेल व गांधी उपस्थित होत्या. जिल्हाधिकारी यांचे मार्गदर्शनाखाली कातकरी उत्थान कार्यक्रमांतर्गत सप्तसुत्री अन्वये मौजे मालडुंगे तालुका पनवेल येथे आदिवासी बांधवांसाठी आरोग्य तपासणी शिबीर आयोजित करण्यात आले. यामध्ये एमजीएम हॉस्पिटल, तालुका आरोग्य अधीकारी, प्राथमिक आरोग्य केंद्र नेरे यामधील डॉक्टर व आरोग्य कर्मचारी यांचे साहाय्य लाभले.
