जमीन घोटाळा: बिल्डर भूपेंद्र शहा यांच्यासह तिघा जणांना अटक

नवी मुंबई (प्रतिनिधी)- न्हावा शेवातील एका जमीन घोटाळा प्रकऱणी नवी मुंबईतील भूमी बिल्डर्स ग्रुपचे मालक प्रसिध्द बिल्डर भूपेंद्र शहा याच्यासह तीन जणांना नवी मुंबई पोलिसांनी अटक केल्यामुळे नवी मुंबईतील बांधकाम क्षेत्रात खळबळ उडाली आहे. शेतकरी असल्याच्या बनावट दाखल्याद्वारे बांधकाम व्यावसायिक असलेल्या शहां यांनी 600  कोटींची 80  एकर जमीन लाटल्याचा आरोप आहे. शेतजमीन विकत घेण्यासाठी भूपेंद्र शहां यानी लातूर येथील शासकीय यंत्रणेला हाताशी पकडून बनावट शेतकरी असल्याचा दाखल मिळवला होता. व पुढे  याच दाखल्याच्या साहाय्याने भूपेद्र शहा यानी उरण येथील 80  एकर जागा विकत घेतली.
याबाबत पोलिसात तक्रारी आल्यानंतर नवी मुंबई पोलीसांनी अधिक तपास केला असता, बनावट दाखल्याचे हे प्रकरण उघड होऊन शहा यांच्यासह तिघांना याप्रकरणांत पोलिसांनी अटक केली आहे. .सर्व आरोपीना बुधवारी पनवेल कोर्टात हजर केले असता, 15 फेब्रुवारीपर्यंतची  पोलिस कोठडी सुनावली आहे. दरम्यान, या प्रकरणात पोलिसांनी यापूर्वी कर्जत येथील तलाठी रमेश भालेराव व त्याचा साथीदार सतीश शिर्के या दोघांना अटक केली.
याबाबत हकीकत अशी कि, एका ट्रस्टचा अध्यक्षाशी  संगनमत करून ट्रस्टची 80 एकर इतकी जागा सन 1995 मध्ये चार लाख रुपयांत (रोखीने) खरेदी केल्याचा आरोप असलेले भूपेंद्र शहा यांनी बनावट शेतकरी दाखल्याच्या आधारे शेकडो कोटींची ही जमीन हडप करून फसवणूक केल्याची तक्रार मे. रिगल हेबिटेट प्रा. लि. या कंपनीचे प्रतिनिधी विक्रम भणगे यांनी न्हावा पोलिस ठाण्यात केली होती. या तक्रारीवरून पोलिसांनी भूपेंद्र शहा, किरण दांड व महम्मद युसुफ ट्रस्टचा अध्यक्ष हारुन अलीम ए. आर. युसुफ, सुरेश शेडगे, बाज खान, रमेश भालेराव व इतर यांच्याविरुद्ध बनावट सरकारी कागदपत्रे बनवून जमीन लाटल्याप्रकरणी गुन्हा दाखल केला आहे. याप्रकरणी पोलिसांनी प्रथम रमेश भालेराव, नंतर सतीश शिर्के याला अटक केली. बुधवारी भूपेंद्र शहा यांना अटक केली. महम्मद युसुफ ट्रस्टची 80 एकर जमीन संपूर्ण दलदलीची व खारफुटीयुक्त असल्यामुळेच ही जमीन चार लाख रुपयांत विकत असल्याचे ट्रस्टच्या ठरावात अध्यक्ष हारुन अलिम याने म्हटले आहे. त्यामुळे ही खारफुटीयुक्त जमीन आता सिडकोच्या घशात घालून सिडकोकडून साडेबावीस टक्के योजनेअंतर्गत सुमारे 50 हजार चौ.मी. क्षेत्रफळाचा भूखंड प्राप्त करण्याचा डाव संबंधित बिल्डरने महसूल व सिडकोच्या अधिकार्‍यांना हाताशी धरून आखला असल्याचा आरोप तक्रारदार विक्रम भणगे यांनी केला.