चिरनेर-रानसई रस्त्याच्या बाजूला महिलेची भोसकून हत्या

जेएनपीटी (वार्ताहर)- चिरनेर-रानसई रस्त्यालगत निर्जन ठिकाणी कचऱ्याच्या खाणीत एका महिलेचा भोसकलेल्या अवस्थेतील मृतदेह सापडल्याने परिसरात एकच खळबळ माजली आहे. सोमवारी (दिर४) दुपारी हा मृतदेह एका चालकाला दिसला. त्यांनी याबाबत उरण पोलिसांना माहिती दिल्यानंतर पोलिसांनी पंचनामा करून हा मृतदेह ताब्यात घेतला आहे. साधारणपणे २५ ते २८ या वयोगटातील ही महिला असल्याचा पोलिसांचा अंदाज आहे. तिच्या अंगावर पाठीवर आणि पोटामध्ये अनेक ठिकाणी धारदार शस्त्रास्त्राने भोसकल्याच्या खुणा आहेत. अंगावर पंजाबी ड्रेस असून यामध्ये फूलांचा कुर्ता आणि भगव्या रंगाचा पायजमा आहे. हातामध्ये हिरव्या रंगाचे दोन प्लास्टीकचे कडे आणि गळ्यामध्ये मंगळसूत्र आहे. उरण पोलिस ठाण्याचे वरिष्ठ पोलिस निरिक्षक जगदिश कुलकर्णी आणि त्यांच्या कर्मचाऱ्यांनी मृतदेह टाकलेल्या ठिकाणी भेट देवून तो सरकारी दवाखान्यात पाठविला. खूनाची बातमी परिसरात पसरल्यानंतर लोकांनी मृतदेह पाहण्यासाठी गर्दी केली होती. मात्र कोणालाही त्या महिलेची ओळख पटली नाही.