प्रलंबित मागण्यांसाठी सरकारला साकडे उद्या लाक्षणिक संप

नवी मुंबई (प्रतिनिधी)- माथाडी कामगारांच्या राज्य सरकार व संबंधितांकडे प्रलंबित असलेले प्रश्न सोडवण्याकडे लक्ष वेधण्यासाठी _महाराष्ट्र राज्य माथाडी ट्रान्सपोर्ट आणि जनरल कामगार युनियनच्या वतीने उद्या दि.२६ फेब्रुवारी रोजी लाक्षणिक संप पुकारण्यात येणार असल्याची माहिती महाराष्ट्र राज्य माथाडी, ट्रान्सपोर्ट आणि जनरल कामगार युनियनचे सरचिटणीस व माथाडी नेते नरेंद्र पाटील यांनी याविषयी माहिती देण्यासाठी माथाडी भवन येथे आयोजित पत्रकार परिषदेत दिली. याप्रसंगी माथाडी नेते तथा माजी मंत्री शशिकांत शिंदे, नगरसेवक चंद्रकांत पाटील आदी उपस्थित होते. माथाडी कामगारांच्या न्याय प्रश्नांची सोडवणूक करण्यासंबंधी यापूर्वी अनेक निवेदने संबंधितांकडे सादर केली आहे. मात्र त्यानंतरही या प्रश्नांची सोडवणूक होत नसल्याने नाईलाजास्तव लाक्षणिक _ बंद पुकारण्यात आला असून समस्त माथाडी कामगारांनी या संपात सहभाग नोंदवावा असे आवाहन माथाडी नेत्यांनी केले आहे. माथाडी कामगारांच्या महाराष्ट्र शासन व संबंधितांकडे प्रलंबित असलेल्या प्रश्नांची सोडवणुक करण्याकडे लक्ष वेधण्यासाठी तमाम माथाडी कामगारांचा बुधवारी लाक्षणिक संप पुकारण्यात आल्याचे माथाडी नेते नरेंद्र अण्णासाहेब पाटील, कार्याध्यक्ष गुलाबराव जगताप, मा.मंत्री शशिकांत शिंदे यांनी प्रसिध्दी पत्रकात म्हटले आहे. माथाडी कामगारांचे अनेक प्रश्न महाराष्ट्र शासन व संबंधितांकडे प्रलंबित आहेत.माथाडी कामगारांच्या न्याय प्रश्नांची शासन व संबंधितांनी तातडीने सोडवणूक करावी, अन्यथा पुढील आंदोलनात्मक भूमिका घ्यावी लागेल, असा इशाराही माथाडी कामगार नेत्यांनी पत्रकातून दिला आहे. माथाडी सल्लागार समितीची पुनर्रचना करणे व पुनर्रचित सल्लागार समितीवर युनियनच्या अनुभवी कामगार नेत्यांची सदस्य म्हणून नेमणूक करणे, विविध माथाडी मंडळाच्या पुनर्रचना करणे व पुनर्रचित माथाडी मंडळावर युनियनच्या सभासद संख्येच्या प्रमाणात मंडळ सदस्यांच्या नेमणुका करणे, विविध माथाडी मंडळातील कार्यालयीन सेवेत माथाडी कामगारांच्या मुलांना प्राधान्य देणे, माथाडी मंडळात पूर्णवेळ चेअरमन-सेक्रेटरी यांच्या नेमणुका करणे, माथाडी अॅक्ट,१९६९ या अधिनियमांतर्गत गठीत करण्यात आलेल्या माथाडी मंडळामार्फत माथाडी कामगारांच्या वेतनात राष्ट्रीयकृत बँक,सहकारी बँक व पतसंस्थांकडून घेतलेल्या कर्जाच्या हप्त्याची कपात न करण्याबाबत कामगार विभागाने काढलेला ५ मार्च २०१९ चा शासन निर्णय मागे घेणे, कळंबोली स्टील मार्केटमध्ये विविध सुविधा उपलब्ध करुन देणे, फॅक्टरीमध्ये माथाडी कायदा व मंडळाच्या योजनेची अंमलबजावणी होणे, विविध रेल्वे यार्डात माथाडी कामगारांसाठी सुविधा उपलब्ध करुन देणे, माथाडी कायदा व मंडळाच्या योजनेतील त्रुटी दूर करणे, विविध माथाडी मंडळातील मे.एव्हीऑन सॉफ्टवेअर टेक्नॉलॉजिस इंडिया या कंपनीच्या संगणक प्रणालीव्दारे देण्यात येणारी सेवा खंडीत केल्याबाबत निर्णय होणे, माथाडी हॉस्पीटलच्या कामाकाजाची चौकशी करण्यासाठी गठित केलेल्या समितीच्या चौकशीचा अहवाल घेणे व हॉस्पीटलचे कामकाज सुरळीत करण्यास सहकार्य देणे, कोल्हापूर माथाडी मंडळातील कामगारांच्या प्रश्नांसंबंधी निर्णय होणे, गुलटेकडी मार्केट,पुणे येथिल कामगारांच्या प्रश्नांची सोडवणुक होणे,माथाडी कायद्यात पोलीस संरक्षणाची तरतुद करणे,गुंड प्रवृत्तीच्या व्यक्तींना आळा घालण्यासाठी समिती गठीत करणे, नाशिक येथील माथाडी बोर्डातील कामगारांच्या लेव्हीच्या प्रश्नाची सोडवणुक होणे,बाजार समितीच्या अनुज्ञाप्ती रथारक मापाडी-तोलणार कामगारांना बाजार समितीच्या कार्यालयीन सेवेत घेणे, वडाळा येथील माथाडी कामगारांची घरकुलातील अडचणी दूर करणे, नवीमुंबई परिसरात सिडकोमार्फत माथाडी कामगारांना घरे मिळणे असे माथाडी कामगारांचे अनेक प्रश्न महाराष्ट्र शासन व संबंधितांकडे प्रलंबित आहेत. त्यामुळे माथाडी कामगारांच्या या उपरोक्त सर्व न्याय प्रश्नांची शासन व संबंधितांनी तातडीने सोडवणूक करावी, अन्यथा पुढील आंदोलनात्मक भूमिका घ्यावी लागेल, असा इशाराही माथाडी कामगार नेत्यांनी यावेळी दिला.