महापालिका आयुक्त अण्णासाहेब मिसाळ यांची 'जय महाराष्ट्र' व 'दिलखुलास' कार्यक्रमात मुलाखत

नवी मुंबई (प्रतिनिधी) - महाराष्ट्र शासनाचे माहिती व जनसंपर्क महासंचालनालय निर्मित 'जय महाराष्ट्र' आणि 'दिलखुलास' कार्यक्रमात 'स्वच्छ व सुंदर शहरनवी मुंबई महानगरपालिका' या विषयावर नवी मुंबई महापालिका आयुक्त अण्णासाहेब मिसाळ यांची मुलाखत प्रक्षेपित होणार आहे. दूरदर्शनच्या सह्याद्री वाहिनीवरून आज शुक्रवारी (दि. २८) सायंकाळी ७.३० वाजता ही मुलाखत प्रक्षेपित होईल. तसेच 'दिलखुलास' कार्यक्रमात शुक्रवार दि. २८ फेब्रुवारी रोजी राज्यातील आकाशवाणीच्या सर्व केंद्रावरून सकाळी ७.२५ ते ७.४० या वेळेत तसेच प्रसारभारतीच्या न्यूज ऑन एअर या अॅपवरही ही मुलाखत प्रसारित होणार आहे. निवेदिका रेश्मा बोडके यांनी ही मुलाखत घेतली आहे. नवी मुंबई महापालिकेने 'स्वच्छ सर्वेक्षण २०१९' मध्ये देशात स्वच्छ शहरांमध्ये संपादन केलेले सातवे स्थान, महापालिकेला मिळालेला ओडीएफ डबल प्लस दर्जा, महानगरपालिका क्षेत्रात कचऱ्याचे संकलन व वर्गीकरणावर सुरू असलेले सकारात्मक काम, स्वच्छता उपक्रमाला नागरिकांचा मिळत असलेला उत्स्फूर्त प्रतिसाद, प्लास्टीकच्या वापराला आळा घालण्यासाठी सुरू असलेले प्रयत्न, स्वच्छ सर्वेक्षण या उपक्रमातील सातत्य व नवी मुंबई महापालिकेने राबविलेले नाविन्यपूर्ण उपक्रम याविषयी नवी मुंबई महापालिका आयुक्त अण्णासाहेब मिसाळ माहितीप्रद चर्चा करणार आहेत. दरम्यान, दूरदर्शन आणि आकाशवाणीच्या सर्व केंद्रावरून प्रसारित होणारी ही मुलाखत नागरिकांनी आवर्जुन ऐकावी असे आवाहन महापालिका प्रशासनाकडून करण्यात आले आहे.