नेरुळ ते भाऊचा धक्का जल प्रवासी सेवा लवकरच

नवी मुंबई (प्रतिनिधी) - सिडकोच्या जल वाहतूक प्रकल्पांतर्गत लवकरच नेरुळ ते भाऊचा धक्का दरम्यान कॅटामरान सेवा सुरू होण्याची चिन्हे आहेत. तसेच या प्रकल्पा अंतर्गत सिडकोतर्फे नेरुळ येथे उभारण्यात येत असलेल्या जेट्टीचेही काम अंतिम टप्प्यात आले असल्याची माहिती सिडकोतर्फे देण्यात आली. नवी मुंबईतील सार्वजनिक वाहतूक व्यवस्था अधिक सक्षम करण्यासाठी सिडकोतर्फे नेरूळउरण रेल्वे प्रकल्पाअंतर्गत उपनगरी रेल्वे सेवेचा उरण पर्यंत विस्तार, नवी मुंबई मेट्रो प्रकल्पांतर्गत चार मेट्रो मार्गांचा विकास इ. प्रकल्प साकारण्यात येत आहेत. या प्रकल्पांबरोबरच नवी मुंबई ते मुंबई दरम्यानच्या वाहतूक कोंडीवर मात करण्यासाठी सिडकोतर्फे पर्यावरणपूरक, तुलनेने कमी खर्चाचा, अधिक प्रवासी वहन क्षमता असणारा व अल्प कालावधीत विकसित करता येण्यासारखा जल वाहतुकीचा पर्याय विकसित करण्यात येत आहे. या अंतर्गत सिडकोतर्फे नेरूळ येथे ३.०५ हेक्टर क्षेत्रावर येथे जल वाहतूक टर्मिनल प्रस्तावित आहे. टर्मिनल अंतर्गत पाइल्ड प्लॅटफॉर्मवर टर्मिनलला जोडणारा रस्ता, टर्मिनलची इमारत, पार्किंग लॉट, युटीलिटीज (इलेक्ट्रिकल पॅनेल रूम, वॉटर टँक, एसटीपी इ.) नेव्हीगेशनल एरिआ आणि मार्शलिंग एरिआ विकसित करण्याचे काम प्रगती पथावर आहे. जल वाहतूक टर्मिनल अंतर्गत उभारण्यात येणाऱ्या जेट्टीचे काम प्रगतीपथावर असून ते अंतिम टप्प्यात आले आहे. राज्य शासनातर्फे मुंबईच्या पूर्व किनारपट्टी प्रदेशात जल वाहतुकीकरिता सोयी सुविधा विकसित करण्याकरिता नोङ्ल एजन्सी म्हणून महाराष्ट्र मेरिटाइम बोर्डाची नियुक्ती करण्यात आली आहे. यानुसार महाराष्ट्र मेरीटाईम बोर्ड, मुंबई पोर्ट ट्रस्ट आणि सिडको ही महामंडळे आपापल्या कार्यक्षेत्रात सागरी वाहतूक सुविधा विकसित करत आहेत. त्यानुसार सिडको व मेरिटाइम बोर्ड यांच्या माध्यमातून वाशी, नेरूळ व बेलापूर येथील खाडी किनारी जेट्टी उभारणे प्रस्तावित आहे. त्यांपैकी नेरुळ येथील जेट्टीचे काम अंतिम टप्प्यात आले आहे. एप्रिल २०२० पर्यंत हे काम पूर्ण होणे अपेक्षित आहे, तर मे २०२० मध्ये प्रत्यक्ष जल वाहतूक सेवा सुरू करणे नियोजित आहे. या प्रकल्पाकरिता सिडकोतर्फे रु. १११ कोटींची तरतूद करण्यात आली आहे.