नवी मुंबई महापालिका दिवंगत कर्मचाऱ्यांच्या वारसांना सानुग्रह अनुदान प्रदान

नवी मुंबई (प्रतिनिधी) - नवी मुंबई महापालिका १ नोव्हेंबर २००५ त्यानंतर रुजू झालेल्या आणि नवीन परिभाषित अंशदान निवृत्ती वेतन व राष्ट्रीय निवृत्ती वेतन योजनेअंतर्गत सभासद असलेल्या अधिकारी, कर्मचारी यांचे सेवेची दहा वर्षे पूर्ण होण्यापूर्वीच सेवेत असताना दुर्देवाने निधन झाल्यास त्या अधिकारी, कर्मचारी यांनी नामानिर्देशित केलेल्या अथवा त्यांचे कायदेशीर वारस असलेल्या व्यक्तीस १० लक्ष रक्कम नवी मुंबई महापालिकेच्या वतीने सानुग्रह अनुदान म्हणून प्रदान करण्यात येते. यामध्ये स्मशानभूमी रक्षक असणारे १८ ऑगस्ट २०१७ रोजी निधन झालेले भरत किसन तातळे यांच्या पत्नी सुगंधा भरत तातळे तसेच वाहनचालक आदेश अशोक चव्हाण यांच्या पत्नी ज्योती आदेश चव्हाण यांना प्रत्येकी १० लक्ष रक्कमेचे धनादेश महापौर जयवंत सुतार यांच्या हस्ते देण्यात आले. यावेळी सभागृह नेते रविंद्र इथापे, माजी महापौर तथा नगरसेवक सुधाकर सोनावणे, जैव विविधता समिती अध्यक्ष अनंत सुतार, अतिरिक्त आयुक्त सुरेंद्र पाटील, महापालिका सचिव चित्रा बाविस्कर, कार्यकारी अभियंता मनोज पाटील आदी उपस्थित होते. नवी मुंबई महापालिका अधिकारी, कर्मचारीहिताय भूमिकेतून महापालिका आयुक्त अण्णासाहेब मिसाळ यांच्या मार्गदर्शनानुसार, प्रशासन विभागाचे उप आयुक्त किरणराज यादव यांनी १ नोव्हेंबर २००५ व त्यानंतर रुजू झालेल्या आणि नवीन परिभाषित अंशदान निवृत्ती वेतन व राष्ट्रीय निवृत्ती वेतन योजनेअंतर्गत सभासद असलेल्या अधिकारी, कर्मचारी यांच्या सेवेची दहा वर्षे पूर्ण होण्यापूर्वीच निधन झालेल्या दोन कर्मचारी यांच्या वारसांना १० लक्ष सानुग्रह अनुदान रक्कमेचे धनादेश देण्याबाबतची कार्यालयीन प्रक्रिया पूर्ण केली.