पनवेल (प्रतिनिधी) ः पायी चालत जाणार्‍या महिलांच्या गळ्यातील मंगळसूत्र, सोन्याची चेन जबरी चोरी करणार्‍या सराईत गुन्हेगारास खांदेश्‍वर पोलिसांनी जेरबंद केले असून त्याच्याकडून आतापर्यंत चार गुन्हे उघडकीस आणत, जवळपास 2 लाख 8 हजार 888 रुपये किंमतीचा मुद्देमाल हस्तगत केला आहे. दरम्यान, आरोपीच्या अटकेमुळे पनवेल परिसरातील सोनसाखळी चोरीचे अजून काही गुन्हे उघडकीस येण्याची शक्यता परिमंडळ 2 चे पोलीस उपायुक्त शिवराज पाटील यांनी व्यक्त केली आहे.
धिरज पाटील (21 वर्षे) रा.अंबिवली असे याप्रकरणी अटक केलेल्या आरोपीचे नाव आहे. गेल्या काही दिवसापासून खांदेश्‍वर परिसरात महिलांच्या गळ्यातील सोेन्याचे दागिने खेचून नेण्याच्या घटनांत वाढ झाली होती. जबरी चोरीचे हे वाढते गुन्हे उघडकीस आणण्याबाबत वरिष्ठ पोलिस अधिकार्‍यांनी पोलिसांना निर्देश दिले होते. त्यानुसार खांदेश्‍वर पोलीस ठाण्याचे वरिष्ठ पोलिस निरीक्षक सुभाष कोकाटे व गुन्हे पोलिस निरीक्षक वैशाली गलांडे यांच्या मार्गदर्शनाखाली पीएसआय निलेश पोळ,पोलिस हवालदार सारंग, घोसाळकर, युवराज शिवगुडे, संभाजी गाढे, सचिन सरगर आदींच्या पथकाने यातील गुन्हेगाराची माहिती मिळवून सापळा लावून त्यास ताब्यात घेतले असता, त्याने खांदेश्‍वर पोलिस ठाण्याच्या हद्दीत आतापर्यंत केलेेल्या 4 गुन्ह्यांची कबुली दिली आहे. तसेच या गुन्ह्यासाठी आरोपीने वापरलेली दुचाकीही पोलिसांनी हस्तगत केली आहे.
