पनवेल (वार्ताहर) - महाराष्ट्र शासनाच्या कल्याणकारी धोरणांनुसार 100% टक्के नोकर भरती स्थानिक प्रकल्पग्रस्त, इतर प्रकल्पग्रस्त व बेरोजगारांना प्राधान्याने सामावून घेणे आवश्यक असताना, पनवेल महापालिका अंतर्गत येणार्या विविध नोकर्यांमध्ये बाहेरील तालुक्यातील व पर जिल्ह्यातील तरुणांची नोकर भरती करून, स्थानिकांवर अन्याय होत आहे. यासंदर्भात काल शिवसेनेचे रायगड जिल्हाप्रमुख शिरीष घरत यांच्या मार्गदर्शनाखाली शिवसेनेच्या शिष्टमंडळाने महापालिका आयुक्त गणेश देशमुख यांची भेट घेवून, नोकर भरतीत 100 टक्के स्थानिक प्रकल्पग्रस्त व इतर प्रकल्पग्रस्तांना प्राधान्य देण्याची मागणी करणारे निवेदन आयुक्तांना सादर केले.
याप्रसंगी महानगर प्रमुख रामदास शेवाळे, तालुका संपर्कप्रमुख योगेश तांडेल, महानगर समन्वयक गुरूनाथ पाटील, उपमहानगर प्रमुख दिपक घरत, नवीन पनवेल शहरप्रमुख यतीन देशमुख, खारघर शहरप्रमुख प्रकाश गायकवाड, पनवेल शहर संघटक प्रवीण जाधव, उपशहर प्रमुख ज्ञानेश्वर भंडारी, युवासेना उपजिल्हा अधिकारी अवचित राऊत, विभाग संघटक रामचंद्र देवरे आदि पदाधिकारी उपस्थित होते.
