पनवेल (प्रतिनिधी) - पनवेल महापालिकेतर्फे 15 वर्षावरील मुलांना नवीन वर्षाच्या प्रारंभी लसीकरण करण्याची जय्यत तयारी करण्यात येत असून पालिका हद्दीतील शाळांमध्ये 10 पथके यासाठी तयार करण्यात आल्याची माहिती गुरुवारी महापौर डॉ. कविता चौतमोल यांनी देऊन पालकांनी लसीकरणासाठी सहकार्य करण्याचे आवाहन केले आहे. नववर्षाच्या प्रारंभी 3 जानेवारी पासून इ.8 वी ते12 वीतील मुलांसाठी (2007 मध्ये जन्म झालेल्या) शाळेमध्ये कोरोना प्रतिबंधक लस देण्यात येणार आहे.
केंद्र शासनाने 15 वर्षा वरील (15 ते 18 वयोगट) मुलांना कोरोना प्रतिबंधक लस देण्यास परवानगी दिल्याने पनवेल महापालिका हद्दीत लस देण्यासंबंधी चर्चा करण्यासाठी महापौर कविता चौतमोल यांनी गुरुवारी महापौर दालनात बैठक घेतली. या बैठकीला सभागृह नेते परेश ठाकूर, प्रभाग सभापती समीर ठाकूर, अनिता पाटील, सुशीला घरत, नगरसेवक डॉक्टर अरुणकुमार भगत, रुचिता लोंढे, नेत्रा पाटील, उपायुक्त सचिन पवार, मुख्य वैद्यकिय आरोग्य अधिकारी डॉक्टर आनंद गोसावी, डॉ.रेहाना मुजावर उपस्थित होते.
यावेळी उपायुक्त पवार यांनी 15 ते 18 वयोगटातील म्हणजेच 2007 मध्ये जन्माला आलेल्या मुलांना कोरोना लस देण्यात येणार आहे. त्यासाठी शिक्षण विभागाच्या मदतीने 230 शाळांमध्ये जाऊन लसीकरण करण्यात येणार आहे.त्यासाठी 10 पथके तयार करण्यात आलेली असून प्रत्येक पथकात एक डॉक्टर असणार आहे. याशिवाय एक रुग्णवाहिका असणार आहे. दररोज 10 शाळा करण्यात येणार आहेत. पनवेल महापालिका हद्दीत सुमारे 40 हजार मुले आहेत. त्यांच्या पालकांनी ऑनलाइन नोंदणी करावी. शाळा बंद झाल्यास जवळच्या शाळेत लस उपलब्ध करून देण्यात येणार असल्याचे सांगितले.
