पनवेल (वार्ताहर) - कोरोना नियमांचे उल्लंघन करणार्‍यांविरोधात पनवेल महापालिकेने कारवाईचा बडगा उगारण्यास सुरुवात केली आहे.
गेली दोन वर्ष भारत कोरोनाशी लढत आहे. कोरोना सक्रमण कमी होण्यासाठी अनेक उपाय योजना सरकारच्या माध्यमातून करण्यात येत आहे. काही दिवसांपूर्वी कोरोनाची संख्या कमी झालेली दिसून येत होती, परंतु आता पुन्हा राज्यात कोरोना सक्रिय झाल्याचे पहावयास मिळत आहे. याच पार्श्‍वभूमीवर ब्रेक द चैन या करिता नाईट कर्फ्यू जाहीर करण्यात आला आहे. सर्वत्र नियम कठोर करण्यात आले असून याची दखल घेत पनवेल महापालिका हद्दीतील व्यवसायिकांना वारंवार सूचना जारी करण्यात येत आहे. तरी देखील काही व्यवसाय चालू असल्याचे निदर्शनास आल्याने कठोर पावले उचलत पनवेल महापालिकेचे अधिकारी सदाशिव कवटे यांनी नियमाचं उल्लंघन करणार्‍या कळंबोली कामोठे व खांदा कॉलनी मधील व्यावसायिकांवर मोठ्या प्रमाणात दंडात्मक कारवाई केली.
नाईट कर्फ्यू जाहीर केल्याने दुकान व्यवसायिकांना नऊ वाजेपर्यंतच दुकाने चालू ठेवण्यास परवानगी देण्यात आली आहे. तसेच हॉटेल व्यवसायिकांना पार्सलसाठी परवानगी देण्यात आली आहे. तरी सर्व व्यवसायिकांनी व नागरिकांनी कोरोना नियमाचे पालन करून पनवेल महापालिकेला सहकार्य करावे असे आव्हान कवटे यांनी केले आहे.
