पनवेल (प्रतिनिधी) - ठाण्याच्या बाळकुम येथील सायकलपटू सई पाटील या बालिकेने पर्यावरण संरक्षण आणि मुलींना शिकवा मुलींना वाढवा हा सामाजिक संदेश देत काश्मीर ते कन्याकुमारी अशी चार हजार किलोमीटरची सायकल मोहिम सुरू केली आहे. आतापर्यंत तिने दोन हजार किलोमीटरचे अंतर यशस्वीपणे पार केले असून पनवेल येथून तिने उर्वरित दोन हजार किलोमीटर प्रवासाचा शुभारंभ नुकताच केला. माजी खा.डॉक्टर संजीव नाईक यांनी सईला् शुभेच्छा देत ती विश्व विक्रमाला गवसणी घालेल, असा विश्वास व्यक्त केला.
सई ही 10 वर्षाची असुन आगरी-कोळी समाजाची मुलगी आहे. स्व. दि.बा.पाटील सांस्कृतिक क्रीडा मैदान,रोडपाली,पनवेल याठिकाणी तिचे स्वागत करण्यात आले.याप्रसंगी सईचे वडील आशिष पाटील हे देखील उपस्थित होते. जलपरी या नावाने ती प्रसिद्ध आहे. दर दिवशी ती 100 किलो मीटर सायकलने प्रवास करीत आहे. सईचे वय लहान असले तरी तिने मोठा संदेश देण्यासाठी सायकल मोहिम आरंभली आहे. आम्ही सगळे या मोहिमेत तिच्या पाठीशी आहोत. पुढील दोन हजार किलोमीटरचा टप्पा देखील ती यशस्वीपणे, सुरळीतपणे पार पाडेल, अशा सदिच्छा संजीव नाईक यांनी यावेळी तिला दिल्या. प्रत्येकाने सायकल जरूर चालवावी यामुळे प्रदूषण आटोक्यात येण्यास मदत तर होईलच शिवाय इंधनाची देखील बचत होईल असे आवाहन सईने यावेळी केले.पनवेलच्या महापौर डॉ.कविता चौतमोल, उपमहापौर जगदीश गायकवाड, नगरसेवक संतोष शेट्टी, हरेश केनी, नगरसेवक अमर पाटील, समीर भोईर, सुनील पाटील आदी मान्यवर सईला शुभेच्छा देण्यासाठी उपस्थित होते.
