नवी मुंबई (प्रतिनिधी) - वाचन संस्कृती जोपासण्यासाठी नवी मुंबई महापालिका परिवहन उपक्रमाच्या 26 व्या वर्धापन दिनाचे औचित्य साधून रविवारपासून लांब अंतराच्या एनएमएमटी बसेसमध्ये चालते फिरते ग्रंथालय सुरु करण्यात आले आहे.
या उपक्रमाअंतर्गत प्रवाशांसाठी मराठी, इंग्रजी भाषेतील वाचनीय पुस्तके उपलब्ध करून देण्यात आली असून प्रवासी वाहतूक सेवेमध्ये अशी सुविधा देणारा हा देशातील पहिलाच उपक्रम आहे. मंत्रालयासारख्या लांब अंतराच्या बसमार्गांवरील प्रवाशांकरिता एनएमएमटी बसेसमध्ये लेट्स रिड इंडिया फाऊंडेशनच्या माध्यमातून चालते फिरते ग्रंथालय उपलब्ध करून देणे ही संकल्पनाच आगळीवेगळी असून बसेसमध्ये वाचनासाठी सहजपणे पुस्तके उपलब्ध झाल्याने प्रवाशांचा वेळ माहिती व ज्ञान मिळविण्यासाठी सार्थकी लागेल आणि या माध्यमातून वाचनसंस्कृती वृध्दींगत होईल असा विश्वास आयुक्त अभिजीत बांगर शुभारंभ प्रसंगी व्यक्त केला.
याप्रसंगी परिवहन व्यवस्थापक योगेश कडुस्कर, शहर अभियंता संजय देसाई, अतिरिक्त शहर अभियंता शिरीष आरदवाड, परिवहन उपक्रमाचे मुख्य लेखा व वित्त अधिकारी निलेश नलावडे, कार्यकारी अभियंता अजय संख्ये, मदन वाघचौडे, सुनिल लाड, लेखक सुधीर सूर्यवंशी तसेच लेट्स रिड इंडिया फाऊंडेशनचे प्रमुख पदाधिकारी आणि इतर मान्यवर उपस्थित होते.
पहिल्या टप्प्यात लांब अंतराच्या 3 बसमार्गांवरील बसेसमध्ये ही ग्रंथालय सुविधा उपलब्ध करून देण्यात आली असून भविष्यात बसेसच्या संख्येमध्ये वाढ करण्यात येणार आहे. प्रवाशांचा बसमधील वेळ पुस्तक वाचनातून ज्ञानवृध्दीसाठी सार्थकी लागावा ही भूमिका या नाविन्यपूर्ण उपक्रमातून जपण्यात आलेली आहे. यामध्ये विविध वयोगटातील प्रवाशांना वाचायला आवडतील अशी विविध विषयांवरील मराठी व इंग्रजी भाषेतील नामवंत लेखकांची वाचनीय पुस्तके उपलब्ध करून देण्यात आलेली आहेत. पुस्तकांची निवड लेट्स रिडच्या माध्यमातून अत्यंत चोखंदळपणे करण्यात आलेली असून पुस्तकांबाबतचे प्रवाशांचे अभिप्राय घेऊन त्यांच्या आवडीच्या पुस्तकांची मागणी करण्यात आल्यास ती पुस्तकेही उपलब्ध करून देण्याचे नियोजन करण्यात आलेले आहे. याशिवाय या बसेसमधील प्रत्येक सीटच्या बाजूला क्यू आर को़ड प्रदर्शित करण्यात आलेले असून ते प्रवाशांनी आपल्या मोबाईलवर स्कॅन केल्यानंतर पुस्तकांविषयी तसेच ग्रंथविषयक उपक्रमांविषयी माहिती तसेच आगामी काळात क्यू आर कोड स्कॅन करून आपल्या आवडीची ई बुक्स वाचनाची तसेच ऑडिओ बुक्स ऐकण्याची अत्याधुनिक सुविधाही उपलब्ध करून दिली जाणार आहे.
बसेसमधील एक विशेष लक्षवेधी बाब म्हणजे बसेसमध्ये उभे राहिल्यानंतर आधारासाठी पकडावयाच्या हँडलमध्ये मराठी व इंग्रजी भाषेतील ग्रंथ व पुस्तक वाचनासंबंधीत वाचनीय अवतरणे (कोट्स) लावण्यात आलेली आहेत.
बसने प्रवास करणार्या प्रवाशांना दर्जेदार ग्रंथसंपदा विनामूल्य उपलब्ध करून देणा-या या अभिनव संकल्पनेचे कौतुक कार्यक्रमप्रसंगी उपस्थित असणा-या नागरिकांनी केले व प्रवासी आता मोबाईलवर काहीतरी वाचत बसून वेळ घालविण्यापेक्षा चांगली पुस्तके वाचून माहिती व ज्ञानात भर घालतील अशा प्रतिक्रियाही व्यक्त केल्या. लोक वाचनासाठी आता एनएमएमटी बसने प्रवास करतील अशा उत्स्फुर्त प्रतिक्रियाही उपस्थितांमार्फत व्यक्त करण्यात आल्या.
