आयुक्त गणेश देशमुख कारवाईसाठी उतरले रस्त्यांवर
पनवेल (प्रतिनिधी) - राज्यासह पालिका क्षेत्रात कोराना रूग्ण संख्या वाढू लागल्याने शासनाने पुन्हा कठोर निर्बंध लागू केले आहेत. नववर्ष स्वागताच्या निमित्ताने आयोजित केल्या जाणार्‍या कार्यक्रमांबरोबरच विना मास्क फिरणार्‍या आणि रात्री 9 नंतर जमावबंदीचे आदेशाचे उल्लंघन करणार्‍या नागरिकांसह कोरोना नियमांचे उल्लंघन करणार्‍यां आस्थापनांवर कारवाई करण्यासाठी पालिका प्रशासनाच्या भरारी पथकाबरोबर आयुक्त गणेश देशमुख हे स्वत: रस्त्यांवर उतरले होते. त्यांच्याबरोबर उपायुक्त विठ्ठल डाके, उपायुक्त सचिन पवार, सहाय्यक आयुक्त वंदना गुळवेही होत्या. महापालिका क्षेत्रातील खारघर, कळंबोली, कामोठे,पनवेल, अशा चारही प्रभागात आयुक्तांनी स्वतः जाऊन दंडात्मक कारवाई केली.
पनवेल महापालिका हद्दीतील अ, ब, क व ड या चारही प्रभागात दि.29, 30 व 31 डिसेंबर या तीन दिवसांमध्ये पथकांनी कारवाई करून एकूण 5 लाख 34 हजार सातशे रुपयांचा दंड वसूल करण्यात आला आहे. यावेळी ठरवून दिलेल्या आसनक्षमते पेक्षा जास्त गर्दी असलेल्या आस्थापना, तसेच ठरवून दिलेल्या वेळेनंतरही आस्थापना सुरू ठेवणार्‍यांवर पालिकेच्या भरारी पथकाच्यावतीने कारवाई करण्यात आली.
सार्वजनिक ठिकाणी गर्दी करणार्‍या आणि मुखपट्टीचा वापर करीत नसलेल्या नागरिकांवरही दंडात्मक कारवाई करण्यात आली. नवीन वर्षाच्या स्वागतासाठी आयोजित करण्यात आलेले कार्यक्रम मर्यादित प्रमाणात करण्याच्या सूचना आयुक्तांनी 29 डिसेंबरला झालेल्या बैठकीत दिल्या होत्या. नववर्षानिमित्त हॉटेल,रेस्टॉरंटमध्ये आयोजित केल्या जाणार्‍या कार्यक्रमांमध्ये करोना नियमांचे उल्लंघन करणार्‍यांवर कारवाई करण्यासाठी प्रत्येक प्रभागामध्ये 50 अधिकारी-कर्मचार्‍यांची भरारी पथके गेल्या दोन तीन दिवसापासून तैनात करण्यात आली. त्यांच्या माध्यमातून नियमांचे उल्लंघन करणार्‍यांवर कारवाई केली जात आहे. हुल्लडबाजी करणार्‍यांवर या पथकाची करडी नजर होती. शहरातील मोकळ्या जागी तसेच सार्वजनिक ठिकाणीही या पथकांमार्फत कारवाई करण्यात आली. त्याचबरोबर प्रमुख ठिकाणांसह बाजारपेठ परिसरात रात्री 9 वाजेनंतर गर्दी होणार नाही याची दक्षता पालिकेच्या भरारी पथकाने घेतली होती.
