पनवेल (प्रतिनिधी) - भाजपच्या पनवेल शहरातील मध्यवर्ती कार्यालयाजवळ काँग्रेसचे प्रदेशाध्यक्ष नाना पटोले यांनी देशाचे पंतप्रधान नरेंद्र मोदी यांच्याबद्दल केलेल्या चुकीच्या विधानाचा भारतीय जनता युवा मोर्चाच्या वतीने सोमवारी जोरदार निषेध करण्यात आला. नाना पटोले यांच्या पुतळ्याला मिरच्यांची धुरी देण्यात आली. यावेळी काँग्रेस प्रदेशाध्यक्ष नाना पटोले यांनी माफी मागितली नाही तर रायगड जिल्ह्यात ज्या ज्या ठिकाणी काँग्रेसचे मंत्री येतील, तेथे त्यांना घेरावा घालू, असा इशारा भाजपचे उत्तर रायगड जिल्हाध्यक्ष आ.प्रशांत ठाकूर यांनी दिला.
काँग्रेसचे प्रदेशाध्यक्ष नाना पटोले यांनी देशाचे पंतप्रधान नरेंद्र मोदी यांच्यावर खालच्या पातळीचे विधान केल्यामुळे राज्यभरात त्यांचा निषेध होत आहे. पनवेल शहरातही भाजप युवा मोर्चाच्या वतीने नाना पटोले यांच्या पुतळ्याला मिरचीची धुरी देउन या घटनेचा निषेध व्यक्त करण्यात आला. यावेळी नाना पटोले हाय हाय, अटक करा... अटक करा नाना टपोलेंना अटक करा अश्या जोरदार घोषणा भाजप कार्यकर्त्यांकडून देण्यात आल्या. यावेळी भाजपचे पनवेल शहर अध्यक्ष जयंत पगडे, प्रभाग समिती ड’च्या सभापती वृषाली वाघमारे, नगरसेवक नितीन पाटील, अजय बहिरा, नगरसेविका रूचिता लोंढे, सरचिटणीस अमरीश मोकल, युवा मोर्चा उत्तर रायगड जिल्हाध्यक्ष मयुरेश नेतकर, भाजप नेते जितेंद्र वाघमारे, युवा मोर्चा जिल्हा सरचिटणीस चिन्मय समेळ, तालुका अध्यक्ष आनंद ढवळे, शहर अध्यक्ष रोहीत जगताप, खांदा कॉलनी अध्यक्ष अभिषेक भोपी, कामोठे शहर अध्यक्ष हर्षवर्धन पाटील, युवा मोर्चा पनवेल शहर सरचिटणीस गौरव कांडपीले, अक्षय सिंग, शिवाजी भगत यांच्यासह पदाधिकारी आणि कार्यकर्ते उपस्थित होते. या वेळी आ.प्रशांत ठाकूर यांनी, पंतप्रधान नरेंद्र मोदी यांच्या चारीत्र्यावर डाग लावण्याचा प्रयत्न काँग्रेसच्या नेत्यांनी केला तर त्यांना योग्य पद्धतीने उत्तर देण्यासाठी भारतीय जनता पार्टी समर्थ असल्याचे सांगितले.
