नवी मुंबई (प्रतिनिधी) - नवी मुंबई महापालिकेतर्फे शहरातील बेकायदा बांधकामांवर कारवाई मोहिम तीव्र केली आहे. काल वाशी व कोपरखैरणे विभागातील बेकायदा बांधकामांवर हातोडा मारण्यात आला.
वाशी विभाग अंतर्गत भुखंड क्र-17, से-28, वाशी येथे नवी मुंबई महापालिकेची परवानगी न घेता, तळ मजल्यावर सामासिक जागेत वाढीव अनधिकृत बांधकाम केलेले होते. या अनधिकृत बांधकामास वाशी विभागामार्फत महाराष्ट्र प्रादेशिक नियोजन व नगररचना अधिनियम 1966 मधील कलम 53 (1) अन्वये नोटीस बजावण्यात आलेली होती. परंतु त्यांनी सदर ठिकाणचे अनधिकृत बांधकाम काढले नव्हते. त्यामुळे या अनधिकृत बांधकामाविरोधात वाशी विभाग कार्यालयामार्फत कारवाई करून ते हटविण्यात आले.
त्याचप्रमाणे कोपरखैरणे विभाग अंतर्गत रूम नं.212, सेक्टर-1, कोपरखैरणे व रूम नं.1213, सेक्टर-12/डी खैरणे, बोनकोडे, कोपरखैरणे, याठिक़ाणी महापालिकेची कोणतीही पुर्व परवानगी न घेता अनधिकृतरित्या बांधकाम हाती घेण्यात आले होते. सदर बांधकामांना कोपरखैरणे विभागामार्फत महाराष्ट्र प्रादेशिक नियोजन व नगररचना अधिनियम, 1966 मधील कलम 54 अन्वये नोटीस बजावण्यात आलेली होती, परंतु त्यानंतरही सदर ठिकाणी अनधिकृत बांधकाम करण्याचे सत्र सुरुच होते.त्यामुळे काल अखेरीस या दोन्ही अनधिकृत बांधकामांवर कोपरखैरणे विभागामार्फत तोडक मोहिमेचे आयोजन करून ते हटविण्यात आले. दोन्ही ठिक़ाणच्या या धडक मोहिमांसाठी कोपरखैरणे व वाशी विभागाकडील अधिकारी व कर्मचारी, अतिक्रमण विभागाकडील पोलिस पथक तैनात होते.
