ठाणे (प्रतिनिधी) - ठाणे जिल्ह्यात आणि मुंबई महानगर प्रदेशात झपाट्याने वाढत असलेल्या कोरोना रुग्णसंख्येच्या पार्श्वभूमीवर जिल्हा आणि मुंबई महानगर प्रदेशातील विविध विभागांच्या प्रमुखांची ऑनलाईन बैठक पालकमंत्री एकनाथ शिंदे यांनी शनिवारी घेतली. स्वतः ना.शिंदे रुग्णालयात कोरोनावर उपचार घेत आहेत. यावेळी त्यांनी प्रशासकीय यंत्रणेच्या सज्जतेचा आढावा घेतानाच जिल्हा व महापालिका प्रशासनाच्या पाठीशी असल्याची ग्वाही दिली.
दुरदृष्य प्रणालीच्या माध्यमातुन ना. शिंदे यांनी शनिवारी ठाण्यासह मुंबई महानगर प्रदेशातील जिल्हाधिकारी, महापालिका आयुक्त, पोलीस आयुक्त, आरोग्य, नगरपरिषदा यांच्या प्रमुख अधिकार्‍यांची आढावा बैठक कोरोनाच्या तिसर्‍या लाटेचा सामना करण्यासाठी प्रशासकीय तयारीची माहिती घेतली.सर्व यंत्रणेने पहिल्या आणि दुसर्‍या लाटेचा प्रभावीपणे सामना केला त्याबद्दल पालकमंत्र्यांनी यंत्रणांचे अभिनंदन केले. फिल्ड हॉस्पिटलची उभारणी, त्याला लागणारे मनुष्यबळ, औषधांची, ऑक्सिजनची उपलब्धता याविषयी पालकमंत्री शिंदे यांनी जिल्हा, महापालिका निहाय आढावा घेतला.
दरम्यान, स्वतःवर रुग्णालयात उपचार सुरू असतानाही ना. शिंदे यांनी जिल्हा यंत्रणेतील अधिकार्‍यांशी साधलेला संवाद ही कृती अधिकार्‍यांचे मनोबल उंचावणारी असल्याची भावना कल्याण डोंबिवलीचे महापालिका आयुक्त डॉ. विजय सूर्यवंशी यांनी व्यक्त केली. यावेळी नवी मुंबई, ठाणे, मीरा भाईंदर, पनवेल, भिवंडी, उल्हासनगर या महापालिका आयुक्तांनी यंत्रणा सज्जतेची माहिती दिली.
