खारघर (वार्ताहर) - युवासेनेच्या यशस्वी मध्यस्तीमुळे खारघरमधील एका रुग्णालयामधून नवजात बालकाला डिस्चार्ज मिळण्यासह त्याच्या उपचारासाठी रुग्णालयाने आकारलेले 9 लाख रुपयांचे बिलही रुग्णालय प्रशासनाकडून माफ करण्यात आले आहे.
खारघरमधील मदरहूड हॉस्पिटलमध्ये 5 महिन्यांत अकाली जन्मलेल्या एका नवजात बाळावर मागील चार महिने उपचार सुरु होते. अकाली (प्रिमॅच्युअर बेबी) बाळ जन्मल्यामुळे इलाज खूप गुंतागुंतीचा होता. रूग्णालयात दाखल करत असतांना त्याच्या नातेवाईकांना हॉस्पिटलकडून साधारणपणे 15 लाख रुपये इतका खर्च अपेक्षित असल्याचे सांगितले होते. कालांतराने उपचार चालू असताना डॉक्टरांच्या मतानुसार गुंतागुंत वाढल्याने सुमारे 27 लाखाच्या जवळपास बिल बाळाच्या आई वडिलांना झाल्याचे हॉस्पिटलकडून सांगण्यात आले. त्यापैकी रोखरक्कम व इतर काही रक्कमेचे कर्ज काढून असे सुमारे 17 लाख रूपये टप्प्या टप्प्याने मुलाच्या आईवडीलांनी हॉस्पिटलमध्ये भरलेे. मात्र उर्वरित रक्कम भरण्यासाठी मुलाचे वडील सक्षम नसल्याने मागील 20 दिवसांपासुन हॉस्पिटलमधून पैसे भरले नाहीत तर डिस्चार्ज मिळणार नाही असे रूग्णालय प्रशासनाने सांगून बाळाची अडवणुक केली होती. मूळचे कर्जत येथील रहिवासी असलेल्या सदर मुस्लीम कुटुंबीयातील दाम्पत्याने याबाबत शिवसेनेच्या स्थानिक कार्यकर्त्यांच्या माध्यमातून मावळचे खा. श्रीरंग (आप्पा) बारणे यांच्याकडे तक्रार करत मदत मागितली होती.त्यानुसार खारघर येथील युवासेना उपजिल्हा अधिकारी अवचित राऊत यांच्यासह इतर पदाधिकार्‍यांनी सदर मदरहूड हॉस्पिटलला भेट देत तेथील प्रशासन व उपचार करणार्‍या वैद्यकीय अधिकार्‍यांशी चर्चा करून खरी परिस्थिती त्यांच्या समोर मांडली व उर्वरित बिल माफ करण्याची विनंती केली. त्यानुसार यशस्वी मध्यस्थी करत उर्वरित असलेल्या बिलापैकी 9 लाख रूपयांचे बिल हॉस्पिटल प्रशासनाकडून कमी करण्यासह बाळाला रुग्णालयातून डिस्चार्ज मिळवून दिला आहे. यावेळी बाळाच्या पालकांनी खा. बारणे यांच्यासह युवासेना पदाधिकार्‍यांचे आभार मानले आहेत.
