पनवेल प्रांत विभागाकडून कारवाई; 4 जेसीबींसह 2 डंपर जप्त
खारघर (वार्ताहर) - खारघर मधील गोल्फ कोर्स’च्या धामोळे पाड्यालगत असलेल्या नैसर्गिक टेकडीवर विना परवानगी खोदकाम करणार्‍यांविरोधात पनवेल महसूल विभागाने कारवाई करुन सदरठिकाणाहून 4 डंपर आणि 2 जेसीबी सील केल्याने पर्यावरण प्रेमी समाधान व्यक्त करीत आहेत.
सिडको’ने खारघर से-23 आणि 24 मध्ये आंतरराष्ट्रीय दर्जाच्या गोल्फ कोर्ससाठी 18 होलची रचना केली होती. मात्र, यातील काही जमीन वनविभागाची असल्यामुळे सिडको’ने 11 होलचे गोल्फ कोर्स उभारले आहे. गोल्फ कोर्सलगत सिडको’ची काही जमीन राखीव आहे. सदर जमिनीवर सिडकोकडून उर्वरित 9 गोल्फ कोर्स’च्या कामाला दोन दिवसापासून सुरुवात करण्यात आली आहे. मात्र, गोल्फ कोर्स’च्या कामासाठी टेकडीवर जेसीबी लावून खोदकाम करुन जमिन सपाटीकरणाचे काम केले जात असल्यामुळे पर्यावरण प्रेमींमध्ये नाराजी पसरली होती. दरम्यान, पर्यावरण प्रेमी नेटकनेक्ट फाउंडेशन’चे संचालक बी. एन. कुमार यांनी पनवेल प्रांत अधिकारी राहुल मुंडके यांच्याकडे याबाबत लेखी तक्रार केली होती. सदर तक्रारीची दखल घेवून कळंबोली सर्कल अधिकारी संतोष कचरे यांच्या पथकाने पाहणी केली असता, खोदकाम करताना कोणत्याही प्रकारची परवानगी घेतली नसल्याचे निदर्शनास येताच 2 जेसीबी आणि 4 डंपर सील केल्याने ठेकेदाराचे धाबे दणाणले आहे.
उर्वरित गोल्फ कोर्स’च्या कामासाठी टेकडीवर जेसीबी लावल्यामुळे भविष्यात बाजूलाच असलेल्या धामोळे पाड्यातील रहिवाशांना धोका होवू शकतो. सदर विषय घेवून धामोळे पाड्यातील काही ग्रामस्थांनी टेकडीच्या खोदकामाला विरोध केला. मात्र, ग्रामस्थांचा विरोध झुगारुन सिडको’ने खोदकाम केले, असे धामोळे पाड्यातील ग्रामस्थांनी सांगितले.
