कामोठे (प्रतिनिधी) - कामोठे नोडमध्ये घडणार्‍या आगीच्या घटनांवर नियंत्रण मिळविण्यासाठी या नोडसाठी स्वतंत्र अग्निशमन केंद्र उभारण्यात यावे अशी आग्रही मागणी कामोठे कॉलोनी फोरमतर्फे सिडको व पनवेल महापालिकेकडे करण्यात आली आहे. यासंदर्भात फोरमच्या सदस्यांनी सिडको एमडी संजय मुखर्जी व पनवेल महापालिकेचे उपायुक्त विठ्ठल डाके यांची भेट घेवून या मागणीचे निवेदन त्यांना सादर केले आहे.
कामोठे शहरात दि.1 फेबु्रवारी रोजी से-11 येथील स्वस्तिक प्लाझा इमारती मधील तळमजल्यावर असलेलल्या हॉटेलमध्ये गॅस सिलिंडरचा स्फोट होऊन मोठया प्रमाणात आग लागून त्यात तळमजल्यावरील हॉटेलचे तसेच पहिल्या मजल्यावरील दोन घरांचे मोठ्या प्रमाणात नुकसान झाले . आग लागल्यानंतर सतर्क नागरिकांनी कळंबोली येथील अग्निशमन केंद्रास आगीच्या घटनेबाबत कळविले. कळंबोली नोडमधून अग्निशमन दलाने येऊन आग आटोक्यात आणली. असे असले तरी कळंबोलीतून कामोठयात पोहचण्यासाठी व वाहतूक कोंडीतुन मार्ग काढण्यास अग्निशमन यंत्रणेला अर्धा तास लागल्यामुळे तळमजल्यावर लागलेली आग पहिल्या मजल्यापर्यंत पोहचली होती. अशा वेळी कामोठे नोडसाठी स्वतंत्र अग्निशमन केंद्र असते तर मदत लवकर पोहचून पहिल्या मजल्यावरील दोन घरांचे नुकसान झाले नसते. ही बाब कामोठे कालोेनी फोरमतर्फे सिडकोचे एमडी संजय मुखर्जी यांना सादर केलेल्या निवेदनातून मांडण्यात आली आहे. त्यामुळे ह्या घटनेची गंभीर दखल घेत, जवळपास 75 हजार मालमत्ता आणि 2 लाख लोकसंख्या असलेल्या कामोठे शहरासाठी सिडकोने तातडीने अग्निशमन केंद्र मंजूर करून ते लवकरात लवकर कार्यान्वित करण्याची मागणी कामोठे कॉलोनी फोरमच्या सदस्यांनी सिडको व्यवस्थापकीय संचालक संजय मुखर्जी यांच्याकडे केली आहे.
यासंदर्भात,पनवेल महापालिका उपायुक्त विट्ठल डाके ह्यांची कामोठे कॉलोनी फोरमचे अध्यक्ष मंगेश अढाव, महिला अध्यक्ष जयश्री झा, रंजना सडोलीकर, बापू साळुंखे, राहुल बुधे अणि अरुण जाधव आदींनी पनवेल महापालिका उपायुक्त विट्ठल डाके यांची भेट घेवून अग्निशमन केंद्राबाबत त्यांच्याशी सविस्तर चर्चा केली तसेच अशा प्रकारच्या घटना भविष्यात घडू नये म्हणून प्रतिबंधात्मक उपाययोजना करण्याची मागणी केली. ह्यावेळी पनवेल महापालिका क्षेत्रासाठी मध्यवर्ती अग्निशमन यंत्रणा केंद्र कामोठे येथे उभारण्याचे पालिकेचे नियोजन असल्याची माहिती उपायुक्त विट्ठल डाके यांनी दिली. तसेच डॉ. सखाराम गारळे, नारायण आपटे , नीलकंठ चोडणकर या टिमने फोरमच्यावतीने सिडको एमडी संजय मुखर्जी यांची भेट घेतली. त्यावेळी सिडको एमडी ह्यांनी दखल घेत, पुढील कारवाईसाठी संबधितांना सुचीत केले. ह्यावेळी फोरमच्या वतीने मंत्रालयातील मुख्यमंत्री, उपमुख्यमंत्री अणि नगरविकास मंत्री कार्यालयाकडे स्वतंत्र अग्निशमन केंद्राच्या मागणीचे निवेदन दिले.
