नवी मुंबई (प्रतिनिधी) - नवी मुंबई महापालिकेतर्फे शहरातील बेकायदा बांधकामांविरोधात कारवाईची मोहिम तीव्र केली असून काल कोपरखैरणे व ऐरोली विभाग कार्यक्षेत्रातील बेकायदा बांधकामांवर कारवाई करण्यात आली. यात कोपरखैरण्यात एका घराच्या तर ऐरोलीत जी +1 इमारतीच्या बांधकामावर हातोडा मारण्यात आला.
नवी मुंबई महानगरपालिकेच्या कार्यक्षेत्रातील कोपरखैरणे विभाग अंतर्गत घर नंबर 83, महापेगाव एमआयडीसी, कोपरखैरणे व घर क्र. 638, से 04, कोपरखैरणे याठिकाणी महापालिकेची कोणतीही पुर्व परवानगी न घेता अनधिकृतरित्या बांधकाम करण्याचे सत्र हाती घेण्यात आले होते. या बेकायदा बांधकामांना कोपरखैरणे विभागामार्फत महाराष्ट्र प्रादेशिक नियोजन व नगररचना अधिनियम, 1966 मधील कलम 54 अन्वये नोटीस बजावण्यात आलेली होती. मात्र त्यानंतरही सदर ठिकाणी अनधिकृत बांधकाम सुरुच होते. त्यामुळे काल अखेरीस या अनधिकृत बांधकामावर कोपरखैरणे विभागामार्फत तोडक मोहिमेचे आयोजन करून करून ती हटविण्यात आली.
नवी मुंबई महापालिका कार्यक्षेत्रातील जी विभाग ऐरोली अंतर्गत सेक्टर 4, ऐरोली येथील घर क्र. एन-34 व ए-43, येथे जी + 1 इमारतीचे बांधकाम नवी मुंबई महापालिकेची कोणतीही परवानगी न घेता अनधिकृतपणे सुरु केले होते. सदर अनधिकृत बांधकामास ऐरोली विभागामार्फत महाराष्ट्र प्रादेशिक नियोजन व नगररचना अधिनियम 1966 मधील कलम 54 अन्वये नोटीस बजाविण्यात आलेली होती. त्यानुसार संबधितांनी केलेले अनधिकृत बांधकाम स्वत:हून हटविणे आवश्यक होते. परंतु त्यांनी अनधिकृत बांधकाम सुरु ठेवेले होते. त्यामुळे काल अखेरीस या अनधिकृत बांधकामावर ऐरोली विभागामार्फत तोडक मोहिमेचे आयोजन करुन ते हटविण्यात आले. या दोन्ही ठिकाणच्या धडक मोहिमेसाठी कोपरखैरणे व ऐरोली विभागाकडील अधिकारी व कर्मचारी तसेच मजूर,गॅस कटर, ब्रेकर, पीकअप व्हॅन तसेच अतिक्रमण विभागाकडील पोलिस पथक तैनात होते.
