घणसोली (प्रतिनिधी)- नवी मुंबई महापालिकेतर्फे शहरातील बेकायदा बांधकामांवर कारवाईची मोहिम तीव्र केली असून काल घणसोली विभाग कार्यक्षेत्रातील जिजामाता रस्त्यालगत, गावदेवीवाडी, व जिजामाता नगर, समर्थनगर, घणसोली याठिकाणी प्रगतीपथावर असलेल्या दोन इमारतींच्या आरसीसी जोत्याच्या बेकायदा बांधकामावर कारवाई करून ते हटविण्यात आले.
नवी मुंबई महापालिकेची कुठलीही पूर्वपरवानगी न घेता, सदर दोन्ही इचमारतींचे अनधिकृतपणे बांधकाम सुरू होते. याबाबत दोन्ही अनधिकृत बांधकामांस घणसोली विभागामार्फत महाराष्ट्र प्रादेशिक नियोजन व नगररचना अधिनियम 1966 मधील कलम 54 अन्वये नोटीस बजाविण्यात आलेली होती. सबंधितांनी केलेले अनधिकृत बांधकाम स्वत:हून हटविणे आवश्यक होते. मात्र त्यानंतरही सदर ठिकाणी अनधिकृत बांधकाम करण्याचे सत्र सुरुच असल्याने काल अखेरीस घणसोली विभागामार्फत तोडक मोहिमेचे आयोजन करून सदरची बांधकामे हटविण्यात आली. या धडक मोहिमेसाठी घणसोली विभागातील अधिकारी व कर्मचारी यांच्यासह 11 मजूर,1 जेसीबी मशिन, 2 ब्रेकर, गॅस कटर-1 तसेच अतिक्रमण विभागाकडील पोलीस पथक असा लवाजमा तैनात होता.
